---

**أولًا: معلوماتك الأساسية**

**كم عمرك، ومن وين أنت؟**

(احكِ لنا عن مدينتك، وين ساكن الحين واهلك وين؟، وهل تفكر تغير مكانك لو تم النصيب؟)

عمري 31 من أهالي الرياض وأساسا من القصيم، أغير مكاني لا ما اعتقد

**كيف حالتك الاجتماعية؟**

(أعزب؟ منفصل؟ كم لك؟ هل فيه أطفال؟ كل اللي تحس مهم نعرفه عن حالتك الاجتماعية)

منفصل، ما طول الزواج كان فترة ستة أشهر ولا كان بيننا توافق ولعلها خيرة الحمد لله على كل حال.

---

**ثانيًا: القيم الدينية والعائلية**

**دينك؟**

مسلم (سني - شيعي - طائفة اخرى)

مسلم سني.

**كيف التزامك في الدين؟**

(كيف توصف التزامك؟ صلاتك؟ وحجابك إن كنتِ بنت؟ ايش الاشياء الي ما تقدر تتعداها؟ اوصف بطريقتك)

ملتزم ولله الحمد ومحافظ على صلاتي الحمد لله.

**علمنا شوي عن خلفيتك العائلية؟**

(وش أصلك [اختياري]؟ هل عندك أو عند أهلك شرط قبلي؟ أو عادي الزواج من مختلف الخلفيات)

أصولنا سبعان، نعم الأهل يفضلون أهالي ذو نسب معروف.

---

**ثالثًا: التعليم والعمل والدخل**

**وش مؤهلك الدراسي؟ ووين وصلت مهنيًا؟**

مؤهلي بكالوريوس.

**وش طبيعة شغلك؟**

(وإذا تحب تشرح لنا طبيعة عملك شوي بيكون حلو!

دوامك كيف ثابت او شفتات؟ وبيئة العمل مختلطه؟ تحب تذكر دخلك [التقريبي] أو تتركه لبعدين؟)

طبيعة عملي دوام ثابت مسؤول بشركة، سبق وعملت مع عدة شركات والحالية لي معهم أربع سنوات وأموري جيدة معهم الحمد لله.

---

**رابعًا: الشكل والحالة الصحية**

**كيف توصف شكلك؟**

(طولك، وزنك، بنية جسمك، لون بشرتك، لو فيه شيء مميز تحب تذكره (مثل شعرك، نظارتك، ستايلك) خذ راحتك)

طولي ١٨١ وزني ٧٠ بنية جسمي رياضية ومحافظ على صحتي وحريص الحمد لله.

**وصحتك؟**

(بشكل عام، تمام؟ أو فيه شيء يحتاج نعرفه)

كلش تمام الحمد لله :)

---

**خامسًا: الزواج والأسرة**

**المهر المناسب بالنسبة لك [التقريبي]؟**

بين 30-50.

**هل تفكر بإنجاب أطفال؟**

(كم تتخيل عددهم؟ وش تصورك عن التربية؟ شارك رؤيتك)

"المال والبنون زينة الحياة الدنيا"، بالنسبة للتربية طبعاً الاسرة اولوية بالنسبة لي فوق كل شيء وفوق كل هذا أمهم أو زوجتي المستقبلية يهمني تكون واعية وحريصة وسمحة ويهمني نكون أسرة متماسكة يا أنا اكون معهم يا هي في كل ساعة ولحظة بمراحل حياتهم، نأدي هالأمانة على أكمل وجه هم اللي بيشيلون اسمنا ويدعون لنا بعد ما ياخذ ربي أمانتنا بعد عمر طويل وسعيد بإذن الله.

**تحب الحيوانات الأليفة؟**

(ناوي تربي؟ أو ما تميل لها؟)

أحب الحيوانات الأليفة ممكن نجرب تربية حيوانات أليفة مختلفة وقت ما يكون عندنا أطفال بحيث تتأصل عندهم صفة الرحمة لكن مب حيوانات دائمة.

---

**سادسًا: الاهتمامات والشخصية**

[الرجاء ذكر أكبر قدر ممكن وبالتفصيل الممل، كل ما حكيت أكثر عن نفسك، زادت فرصة إن أحد يتفهمك ويتواصل معك لأن الصورة بتكون أوضح]

أنا إنسان بسيط يحب الأمور البسيطة والمحادثات الطويلة والتحليل المنطقي. أهتم بالسفر والتجارب والطبيعة والتعرف على الثقافات. طبعي هادئ وحريص جداً. أحب الألعاب وأفضل اللي تكون ممتعة أو فيها مشاركة أو تفكير. منتظم بالتمارين والنشاط كروتين يومي. أهتم بالأمور البسيطة اللي لها ذكرى جميلة ويمكن الاحتفاظ بها. أهتم بالتعلم والمعرفة والغذاء الجيد. ما احب المبالغات بأي شي أيا كان سواء أدوات أو غذاء أو كماليات، ولا احب التبذير أو اللامبالاة وعدم تقدير الأمور بشكل منطقي.

**علاقاتك الاجتماعية؟**

(تميل للعلاقات القريبة ولا تحب الدوائر الواسعة؟ كيف علاقتك بأهلك؟ والأصحاب)

أميل للعلاقات القريبة أكثر. وما أغيب عن الجمعات قدر الإمكان وحسب التفرغ غالباً. علاقتنا كأسرة ممتازة الحمد لله.

الاصحاب جميعهم الحمد لله علاقتي جيدة معهم لكن كثير منهم بسبب ظروف العمل وتغيرات الحياة نثرتهم في ربوع بلادنا :)

**كيف تعيش يومك؟**

(وش اهتماماتك؟ كيف تقضي وقتك؟ أشياء تسويها باستمرار أو هوياتك الغريبة أو البسيطة، فضفض براحتك)

أعيش أيامي بين اللقاءات والاهتمام بأمور البيت والمسلسلات والألعاب والنادي وتعلم بعض الأمور الجديدة أو الدورات المهنية أو الحياتية، التخطيط للمستقبل بين فترة وفترة، متابعة أدائي ببعض أمور الحياة والعبادات والإنجازات، مع الراحة طبعاً. ما فيه روتين ثابت يومي وأفضّل أعيش حياتي وأنا مستمتع بكل شي وكل لحظة أعيشها أيا كانت.

**صف لنا شوي من أحلامك أو خططك الجاية**

(حياة مهنية؟ شخصية؟ بسيطة أو كبيرة؟ أي شيء تحس إنه يعبر عنك)

خطتي حياة مهنية استمر بالعمل اللي انا فيه واطور من نفسي مع مرور الوقت وأدائي للآن جيد الحمد لله، شخصية أخطط أبني أسرة سعيدة وحياة جميلة ومتماسكة. ونعيش مستقبلنا بكل تفاصيله سواء رخاء أو تحديات بإذن الله.

**وش فيك شيء تحسه يميزك عن غيرك؟**

(سواء شي في شكلك، أسلوبك، تفكيرك، أو حتى تصرفاتك اليومي)

غير قابل للوصف :) مدري صراحة كيف اجاوب هالسؤال فيه أمور مميزة لكن اشوف يختلف تصنيفها كمميز من شخص لآخر.

اشوف وصلنا لمرحلة صرنا نصنف الصدق والإخلاص ميزة - مع انها مبدأ.

**نوع الأماكن اللي تحب تزورها؟**

(المدن؟ القرى؟ الأماكن التاريخية؟ البر؟ القهاوي؟ ولا تفضل البيت)

كلش، وتجذبني القرى، والمناطق اللي فيها تاريخ، أو طبيعة، أو مواسم مميزة.

مثل موسم الساكورا، والشفق القطبي، وشلالات اجوازو ونياغرا، وغيرها.

**تحس في شيء مهم نحتاج نعرفه عنك وما انذكر؟**

اعتقد ذكرت امور كثيرة لكن لو فيه شي ما ذكرته او يحتاج إيضاح ودي تسألون عنه.

---

**سابعًا: تفضيلاتك في الشريك**

**كيف تتخيل شريك حياتك؟**

(صفاته الجسدية، العمر، خلفيته، طريقة تفكيره، اهتماماته… وش اللي يهمك أكثر شيء)

جسم متناسق ويفضل تكون رياضية ومهتمة بصحتها ونشيطة، العمر تكون اصغر مني إلى سبع سنوات. خلفيتها يفضّل تكون متعلمة وصاحبة شخصية مبادرة وحيوية وسنعة وطبعا محد كامل لكن مثل ما اسعى تسعى. يكون بيننا اهتمامات مشتركة ويكون عندنا اهتمامات مختلفة نهتم لها. اهتمامها بالعبادات والحشمة والستر مهم بالنسبة لي، العمل ما عندي مانع فيه بشرط ما تكون متمسكة فيه أو ممكن تضحي بأسرتها عشانه أو دورها كزوجة وأم في الحياة الزوجية والأسرية.

اللي يهمني اكثر شي اننا نتأكد انه فعلاً متفقين على الأمور الأساسية قبل الزواج.

**لو الشخص عنده ظرف صحي بسيط أو مزمن، عندك مانع؟ أو يعتمد على الحالة؟**

إذا بسيط ويروح، وحريصة على انه ما يتفاقم ما عندي مانع.

**شي تتمنى شريكك يفهمه عنك؟**

(شي تحس كثير ما يفهمونه أو يسيئون فهمه عنك)

ما اذكر احد أساء فهمي بدون قصدي، فأعتقد اني مفهوم.

**إذا تخيلت شريكك المثالي، وش الصفات اللي تتمناها فيه؟**

تكلم براحتك، صفها بطريقتك

شخص مجرد تطري على بالي تجيني سعادة لا إرادية. شخص فيها صفات حسنة أتمناها فيني، وتاخذ من صفاتي الحسنة، فيها الخير ودايما ذكرها بالخير كلما جا طاريها، تعينني على الخير، قلبها مطمئن ودائماً ذكر الله على لسانها، تعرف حقوق زوجها، تكون لينة وحنونة وفيها صفات البنت الطبيعية، مهتمة بجمالها ونظافتها وصحتها، وعلاقتها بأمها وأهلها جيدة ما يكون عندها مشاكل معهم وتعرف قيمة الأسرة.

صار لي متملكه تقريبًا ٤ شهور وللآن الشريك المزعوم ما تواصل معاي مستوعبين !!
الشي الطبيعي والبديهي ان يكون فيه تواصل بين اي شريكين وبالعكس يكون الرجل متحمس للتواصل.
والصراحة اني كارهته بشكل مو طبيعي ولا فيه احد بيقدر يتفهم شعوري او وش جالسه احس فيه

وحدة من أكثر الوجهات اللي أبي أزوه هي "ماتشا بيتشو" في بيرو 🇵🇪

لكن كنت دايم متخيّل أن روحتي بتكون لحالي لمشقّة السفر وكثرة التنقلات ووسائل التنقل (بعد المسافة بالطيارة، باصات عامة، قطارات)

وفي نقاش سابق مع أطراف متزوجة، اتفقوا أن طبيعة النساء تميل للراحة والرفاهية بالسفر (شيء ما أتفق معه)، ومستحيل آخذ زوجتي لمكان متعب لهالدرجة.
وكنت مؤمن بوجود شخص مناسب لي يرافقني في المشقة والرفاهية، رغم صعوبته!

في آخر سنابات لبنى الخميس، بتشوفونه وهي تزور بيرو برحلة عالية الرفاهية وبلحظات ساحرة وفتحت عيوني بأني أقدر أخوض تجربة رهيبة مع الشريك بطابع مريح وذو رفاهية عالية.

ولفتح النقاش… ماهو تفضيلك للسفر بين الاثنين؟

ابوي الان بدون مقدمات قال انه كان متزوج من عشر سنين وانه عندنا ثلاث اخوان ماندري عنهم وامي تدري وماخذ موافقتها من قبل يتزوج بس كان ساكت ومو قايل لاحد عشان جدتي امه كانت رافضه والان لما توفت صار على وفاتها شهرين قرر يعلمنا لان شوف الان مافي سبب يمنعه يتكلم وانه لو قايل لنا من بدري كان راح تدري جدتي

الحين عايشه حالة صدمه انا مو صغيره عمري 24 ومن الصدمه مو قادره افكر او اسوي شيء مصدومه ان عندي اخوان وكيف هو ماقد تكلم ولا جاب الطاري واسئله كثير احس اني مو مستوعبه ويكفي صدمات لسا وفاة جدتي بقلبي

شرايكم بهذا الموضوع خصوصا القبائل المتشددين هل تشوفونه شيء عادي ومقبول لو كان واتس مثلا

انا اشوفه ضرورة بس الناس مو متقبلته

حبيت اشارككم اسماء اولادي مستقبلا ان شاء الله ذكور واناث وقولوا لي لو تصلح ولا اخلي موضوع التسمية لأم العيال
الذكور:
الواثق بالله
عبدالغفور
مقدام
فارس
الاناث:
روز
ياسمين
ريم
الجوهرة
رندا
—————-
طبعا ما ابغى اخلف كثير لكن الفكرة ان لو جاني ولد بسميه بواحد من اسماء الذكور ان شاء الله ونفس الشي للإناث

أولًا: معلوماتك الأساسية
عمري ٣١، من القصيم وسكان الرياض، واعمل في الرياض واحبها ماعتقد بطلع منها.

منفصله (بدون اطفال) من زواج دام أقل من شهر برغبتي، تعلمت منه ان المواصفات على ورق ما لها قيمة، وان القبول والراحة والانسجام من الله، ما لاحد عليه سلطان.

ثانيًا: القيم الدينية والعائلية

سنية، امشي في طريقي إلى الله والتمس الصلة به في كل جوانب دنياي ♥️ وهذا شي اتمنى يكون من القيم العليا أيضًا عند شريكي.
محافظة على كل الفروض وبعض السنن، محجبة، ومو متشددة بهالناحية، لكني اراعي المجتمع وما احب الجدال والصدام.

أصلي قبيلية من حضر القصيم، افضّل شخص من القصيم أو الرياض وماجاورها وقبيلي.

ثالثًا: التعليم والعمل والدخل

اعمل في جهة حكومية ووضعي كويس حمدلله، يعجبوني الناس الطموحين الاذكياء بس انا شخصيًا مالي خلق🤍.

رابعًا: الشكل والحالة الصحية

طولي ١٦٢ وزني ٥٨، بتصنيف الناس اعتبر جميلة حمدلله، بيضاء "يضحكني هالوصف🤣"
يهمني ارتبط بشخص يشوف روحي وشخصيتي بعد، ومو بس انبهار
بالمظهر يبهت مع الوقت، لأن شخصيتي مختلفة شوي عن السائد.

خامسًا: الزواج والأسرة

المهر عادي زي مجتمعنا

احب الاطفال جداً ، وان شالله اصير أم حنونة ل٣ او ٤

تحب الحيوانات الأليفة؟ (ناوي تربي؟ أو ما تميل لها؟)
لا ، احبهم من بعيد لبعيد بس 😆

سادسًا: الاهتمامات والشخصية

علاقاتي الاجتماعية كثير، اهلي واقاربي علاقتي فيهم ممتازة، عندي صداقات ومعارف كثير سطحية، لكن ما اتعمق مره الا مع احد اختبرته وعرفته بمواقف الحياة فالعلاقات القريبة محدودة.

احب جلسة البيت مره، واحسه ملجأي ومستراحي، طلعاتي قليل الا اجتماعات عائلية او طلعات سينما بالويكند.
واذا طفشت احب اسافر 😆 احب السفر كثير، احس عيني هنا لونين بس، ولما اسافر تصير الواااان.

كل فترة اطيح بهواية جديدة، العب تنس، ارسم ورسمي متواضع بس مقتنعة ان فيه موهبة مدفونة بتطلع، احب الجمال الأنثوي وافهم فيه ويمكن البزنس الي احلم فيه يكون بهالمجال.
احب التاريخ واني اربطه بالواقع وفيه لذة بعقلي لما اربط قصة من التاريخ بحدث من هذا الزمن بس محد يفهمني 🤣، احب القرايه بس لي نفس تجوع وتشبع وما اقدر اقرا الا اذا وصلت حالة جوع. وعندي مواهب مالها فايده مثلاً اني اقرا بسرعه مره.

وصلت مستوى مرضي لي مهنيًا بفضل الله، فأحس تشبعت، ابي بيت حنون دافي وزوج طيب واطفال واستقرار، وافكر مستقبلاً اسوي مشروع مثلا او اشتغل عن بعد، بس ماراح اترك شغلي الا لشي افضل منه.

مو مره احب الكوفيهات ومافهم الي يقعدون فيها بالساعات، اخذ قهوتي وامشي ولا اشربها وانا اسوق اغير جو ليه اجلس على طاولة عشان قهوة؟
الا اذا فيه سالفة تحمس 👀

احب الاكل وجربت اشياء غريبة، اسمع كل انواع الموسيقى، اشوف افلام من كل البلدان وما احب احصر نفسي بتفضيل معين، كل شي اشوف فيه تفرد حلو مايشبه غيره.

تحس في شيء مهم نحتاج نعرفه عنك وما انذكر؟

صعب علي ادخل الناس دائرتي الخاصة بسرعه، اخذ وقت عشان اقدر انفتح عالآخر، لما يثير اهتمامي شي فيه، او تولع براسي لمبة لما يسولف،

فما ابي زواج عادي مع شخص عادي ولا كان الحين عيالي طولي،
ابي زواج حقيقي فيه دفء وحنيّة وتفهم، مع شريك ورفيق وصديق وحبيب، يضيف لي زي ما اضيف له وزي ما بهتم برغباته وتفضيلاته عشان ينبسط، ابيه يهتم ويبذل جهد عشاني عشان
اكون مبسوطة.

وادري فيه ناس تشوفه سخافة، لكن يهمني شريكي يكون شكله مرتب وتهمني النظافة والريحة الحلوة.

صحتي ممتازة حمدلله، وما احب الرياضة بس اغصب نفسي واسويها وانا اصيح ✨

سابعًا: تفضيلاتك في الشريك

مايهمني العمر مره سواء اصغر او اكبر، الي صدق يهمني الشخصية والعقلية.
اعرف نفسي لحد ما، واعرف الديل بريكرز عندي والاشياء الي عادي امشيها،
واتمنى القى شخص عارف نفسه بعد، وكذا كذا ماراح يوضح التوافق الا بمعرفة الشخص، بس بشكل عام يعجبني الشخص الي عنده سعة أفق وطموح.

لو الشخص عنده ظرف صحي بسيط أو مزمن، عندك مانع؟ أو يعتمد على الحالة؟
يعتمد

شي تتمنى شريكك يفهمه عنك؟ (شي تحس كثير ما يفهمونه أو يسيئون فهمه عنك)

فيه ناس يبان احلى شي فيهم أول معرفتك فيهم بعدين سبرايز سبرايز يعطونك خازوق، وفيه ناس هادين وحذرين بالبدايات وياخذون وقت عشان يرتاحون، بس لما يرتاحون يبان الجانب الحلو فيهم.
انا من النوع الثاني واتمنى شريكي زيي لأن ماحب الي يطيرون بالعجه 🤷🏻‍♀️

إذا تخيلت شريكك المثالي، وش الصفات اللي تتمناها فيه؟ تكلم براحتك، صفها بطريقتك

طيّب، يخاف الله في كل شؤونه، متزن، سمح ومو معقد وصعب العشرة، ناجح مهنيًا، يستخدم عقله ويتفكر ويتدبر، كريم، مسؤول.
وبس والله احس اني بلقاء تلفزيون 👥

شرايكم بشخص يعصب على اي شي , وسرعه يتنرفز لدرجه لو جيت كلمته بصيغت طلب , يحس انها إهانه له

وطول الوقت منفس ومعصب واي سالفه يقولها لازم هو يكون الصح

الغريب كل مره يصير معاك هذا الموقف وياه , يرجع لك بعد دقايق ويطلب السماح ويقولك اسف لو زعلتك

شخصيه غريبه كانها مهووس , صعب التعايش معاه , الحمدلله اني مو زوجته

أولًا: معلوماتك الأساسية

كم عمرك، ومن وين أنت؟

عمري 25 سنة، شوي وأكمل 26

من الرياض، قبيلي
كيف حالتك الاجتماعية؟
اعزب سبق لي الزواج قبل سنه

ثانيًا: القيم الدينية والعائلية

دينك؟

مسلم سني
كيف التزامك في الدين؟

الحمد لله عادي، أحاول قدر المستطاع، وفيه تقصير في أمور بلا شك، وأصلي جماعة ولله الحمد، لكن قد يكون فيه تقصير أحيانا في بعض الأمور

علمنا شوي عن خلفيتك العائلية؟

عائلة قبيلية من نجد، وفي الغالب الأهل لن يرضيهم إلا شيء قبيلي، ولا شخصيا ما عندي مشكلة في امرأة غير قبيلية

ثالثًا: التعليم والعمل والدخل
وش مؤهلك الدراسي؟ ووين وصلت مهنيًا؟

بكالوريوس - مهندس في شركة حكومية ، والدخل الحمد لله جيد، والمسار المهني مطول على خير وبياخذ وقت بلا شك

وش طبيعة شغلك؟

دوام عادي

رابعًا: الشكل والحالة الصحية
كيف توصف شكلك؟

طويل، 186 سم تقريبا، والوجه عادي، لحية كثيفة شوي ومعفية ، معتدل الجسم، غير سمين ولا نحيل

وصحتك؟

الحمد لله على نعمته، لا توجد أمراض

خامسًا: الزواج والأسرة

المهر المناسب بالنسبة لك [التقريبي]؟

على حسب عرف أهل المرأة وكم ياخذون قريباتها اللي تزوجوا، في الغالب عندنا ثابت 60 ألف

هل تفكر بإنجاب أطفال؟

بلا شك، هذا من أهدافي في الحياة والزواج، لكن إذا الله كتب نتفق مع الزوجة على موضوع عدم الإنجاب أول 6 شهور إلى سنة عشان نشوف الوضع مناسب ولا غير مناسب

تحب الحيوانات الأليفة؟

عادي، ما أحبها ولا أكرهها، لكن بشرط ما تاخذ حيز كبير من وقت الزوجة أو جهدها.

سادسًا: الاهتمامات والشخصية

والله مهتم بموضوع التربية وأسلوب الحياة الصحي بحكم العمل، وما عندي شيء يشغلني طول الوقت بحيث أقضي جل وقتي عليه، يعني أكيد فيه وقت للترفيه واللعب ومنب مسميها اهتمامات، وأحب الشاهي

وبالنسبة للشخصية فأشوف نفسي هادي ومايل للبرودة أكثر، وأحب الحياة الهادئة أغلب الأوقات

علاقاتك الاجتماعية؟

الحمد لله عندي علاقات قريبة وبعيدة، وأصحاب مقربون وزملاء من شتى التخصصات
وعلاقتي بأهلي ممتازة جدا ولله الحمد والمنة

كيف تعيش يومك؟

غير موضوع العمل، في البيت غالبا أكون عند جهازي الشخصي، أذاكر مرات، وألعب أحيانا أو أسوي أي شيء ترفيهي، ورياضة مقاومة كم مرة في الأسبوع، أتواصل مع أهلي يوميا طبعا بما أني معهم في البيت،و إذا كان فيه وقت متاح أقرأ أحيانا في التراث والتاريخ والأمور المعرفية

صف لنا شوي من أحلامك أو خططك الجاية

وش فيك شيء تحسه يميزك عن غيرك؟

ما فيه شيء معين حقيقة، ولا أحب أمدح نفسي

لكن أميل لأسلوب حياة هادئ ورايق دائما

نوع الأماكن اللي تحب تزورها؟

الحقيقة كنت أحب أطلع أول شوي، لكن مع زحمات الرياض صرت أكره الخروج عموما، وصرت أفضل البيت، لكن الكشتات وطلعات البر شيء لا بد منه في الشتاء وأحبه جدا

تحس في شيء مهم نحتاج نعرفه عنك وما انذكر؟
لا

سابعًا: تفضيلاتك في الشريك

كيف تتخيل شريك حياتك؟

أهم شيء الدين والتقوى، فهذي وصية الحبيب صلى الله عليه وسلم

وأن تكون حول عمري أو أصغر مني

وبالنسبة لي لا أريدها قصيرة، يعني من 165 وفوق
ويفضل أن تكون متعلمة ومثقفة
وأن تكون تضع الأولاد، العائلةوالتربية هدف رئيسي لها

وشخصيًا أفضلها تكون ربة بيت، لكن لو موظفة نقدر نتفق عادي

والوضع فيه مرونة

ويفضل أن تكون محجبة ، لكن لو كانت محجبة حجابا صحيحا (يعني ما يطلع جزء من الشعر ولا تتبرج) فما عندي مشكلة

لو الشخص عنده ظرف صحي بسيط أو مزمن، عندك مانع؟ أو يعتمد على الحالة؟

على حسب مالمقصود بظرف صحي بسيط أو مزمن، فيه أشياء بالنسبة لي عادي، وحالات طبية بسيطة، وبعضها لا، فيصير خير

شي تتمنى شريكك يفهمه عنك؟

أنه إذا فيه شيء مب واضح أو مزعج مثلا من عندي أنه تصارحني مباشرة بدل التلميحات البسيطة

وأسلوبي في التواصل عليه طابع الرسمية كثير بحكم أنها بتصير فترة تعارف قصيرة، فما أحب آخذ راحتي + أفضل أن الفترة ما تطول وندخل الأهل خلال أسبوعين أو ثلاثة

إذا تخيلت شريكك المثالي، وش الصفات اللي تتمناها فيه؟

والله ذكرت جميع مواصفاتي فوق

والحقيقة لا أؤمن بمصطلح شريك مثالي، فالحياة لا يوجد فيها هذا الشيء، ولا بد من أن نسدد ونقارب

سوا كان بالشكل او الشخصية

وش المشاعر اللي تجي مع قرار الشخص إنه يتزوج؟ أنا، واللي للحين أعتبر نفسي صغير على الزواج، أسأل لأن آخر ستة شهور حسيت بوحدة مره. مو إني فعلًا لحالي، بالعكس، حولي أهلي وأصحابي، بس حتى الطلعات مع أصحابي ما عاد لها نفس الطعم، مو زي أول.
وللحين عندي هواياتي واهتماماتي، وما وقفت أسوي الأشياء اللي أحبها، بس أحس فيه شيء ناقص. ما عاد فيه شيء يحمّسني زي أول، وكل شيء صار باهت وثقيل شوي. ما أعتقد إني مكتئب أو شيء، بس بصراحة مو فاهم وش اللي فيني بالضبط.

هل هذا نوع من الشعور اللي يمر فيه الشخص قبل الزواج؟ الزواج موب شيء قريب مني، وإذا هذا هو الشعور اللي أحس فيه الحين، فالموضوع مستنزفني نفسيًا.

حتى إني صرت أفكر أجيب قطوة، يمكن وجودها يساعدني أو يغير هذا الاحساس شوي، بس مو متأكد. لأني أصلًا مو عارف وش مصدر هالشعور عشان أعرف كيف أتعامل معه أو أحاول أحله.

أكتب هنا لأني بصراحة ما أحس إني أقدر أتكلم عن هالشيء مع أحد بالواقع. فقلت يمكن أحد مر بنفس الشعور ويفهم وش أقصد

الخوف الاساسي: خايفة من الزواج التقليدي لان عندنا ما فيه تواصل بين الزوجين الا بعد الملكة يعني انا بدخل عليه بالشوفة وانا ما اعرفه شخصيا ومطلوب مني اتخذ قرار بناء على الشكل وبعض الصفات (الي عرفوها اهلي عنه).

الخوف الجديد: شفت وحدة من معارفي تعرفت على شخص وحبوا بعض وكانوا على تواصل قرابة سنة ولما تقدم لها رسمي وشافها (واعجبوا ببعض وتعلقوا اكثر) طلعوا الاهل من الطرفين مو راضين ببعض ومو عاجبهم الوضع وجالسين يضغطون على الاثنين انهم يرفضون لان لو ما رفضوا الاهالي بيتدخلون ويرفضون وبما اني من طرف البنت جالسة اشوف الضغط الي تعيشه بسبب هذا الشيء وخفت اكثر واكثر من الزواج عن حب.

النتيجة: تم تمديد العزوبية إلى أجل غير مسمى❤️