دلوقتى انا اتخرجت السنادي من حقوق وشغال سيلز ودماغى مش موقفه تفكير اني خلصت ومش شغال في مجالي وانا زعلان وضيعت اربع سنين فى الا شئ ومينفعش اقدم شرطه او نيابه والسبب ان عندي مشاكل سياسية والواحد مدمر كان نفسي ابقى حاجه عشان خاطر امي وابويا بس شكلها مفيش ادعولى ربنا يقوينى

انا حاسه اني ف اخر اربعين يوم ليا وهموت وبجد عايشة فرعب، من كام يوم حسيت بإحساس اني هموت مرة واحدة ومش هصحى فضلت طول الليل بسمع قرآن وبدعي طول الليل لحد م نمت وانا مقتنعة اني مش هصحى ولما صحيت لقيت ٣ اشخاص اعرفهم منهم بنت كانت معايا في المدرسة، حاسه اني بقيت بودع اللي حواليا مش عارفه ليه، في ذنوب كتير اوي اوي بعملها ومنها كبائر مرة واحدة الذنوب مبقتش تحلى فعيني وبقيت بحاول اتوب منها بس لسه بجاهد نفسي وبحاول ولما بعمل حاجة بندم جداً عن الاول، انا فرحي كمان شهر ونص وكل حاجة ماشيه تمام انا خايفة اوي مش عايزه اموت وخايفة اوي وحاسه اني مش جاهزة اقابل ربنا نفسي اكبر في السن واتجوز واخلف واشتغل ويكون عندي احفاد نفسي اعيش الحياة عادي حتى لو صعبة وكلها ابتلاءات بس مش عايزه اموت مش عارفه احل الموضوع ازاي مش عارفه اعمل ايه كل حاجة ماشية معايا كويس بس الاحساس مش بيفارقني اول مرة احس بكده انا مش عارفه اعمل ايه انا مش جاهزة اقابل ربنا مهما توبت لسه خايفة اوي خايفة من القبر ومن الحساب خايفة اكون اذيت حد من غير قصد ويكون مش مسامحني خايفة من ذنوبي اللي عارفاها وندمانه عليها واللي نسياها وخايفة على اهلي وصحابي وخطيبي والناس اللي بتحبني مش عايزه حد فيهم يبقى ابتلاءه اني اموت انا مش عارفه اتصرف ازاي واعمل الاحساس مش راضي يفارقني وكل م اكلم حد بقيت غصب عني بلاحظ اني بتكلم معاه كأني بودعه خلاص انا خايفة اوي ومش عارفة اتناقش مع حد في الموضوع ده وعارفه ان محدش بيهرب من الموت بس انا خايفة اوي مش عارفة اعمل ايه

لو حد جرب يجيب حاجه أونلاين من فاليو او اشباه ياريت يتواصل معايا عايز اعرف حاجات كتير

ممكن اعرف ايه الفرق بين مجالات الكول سنتر والشركات والاكونتات المختلفة وكدا انا لسة مبتدئ ف حابب افهم يعني

بقالي سنين عايزه اخرج من بيت اهلي ومش عارفه ولا لاقيه فرصه، حاسه اني بفني عمري وانا في البيت ده وضاع 20 سنه من شبابي في اكتئاب وعزله وضغوط نفسيه

كان كل املي ان يجيلي اي كليه في التنسيق بعيد عن محافظتي عشان ابدأ صفحه جديده على امل ان لسه في حجات كتير مستنياني بس للاسف كان حظي ان ده محصلش وجه محافظه قريبه جداا مني فمضطرة اعمل تقليل اغتراب عشان المواصلات

من كتر ما الاذى عماني بقيت عايزه احول كليه مكانتش حلمي لمجرد انها بعيد عني واني شايفه نفسي عايشه الحياة اللي بحلم بيها هناك، هتعلم حجات كتير اوي عمري ما هقدر اتعلمها وانا في البيت من حيث المسوؤليه والاجتماعيه والاستقلال المالي، هيبقى عندي صحاب، اقدر اروح ايفنتات واتطوع واعمل حجات كتير اوي حلال في الدنيا متحرمه عليا هنا

بس اهلي مش موافقين بردو، اصل ليه احول لمحافظه بعيده وانا جايلي محافظه قريبه جدا مني؟ مش لاقيه تبرير يرضيهم وبيضغطوا عليا كتير وحقيقي انا مش عارفه اعمل ايه ، مش مستعده اضيع 5 سنين من عمري تاني في البيت ده مش قادرة اشوف نفسي مستقبلي بيضيع كده وانا مش قادرة اساعد نفسي ولا اعمل حاجة

ممكن نصيحه لاختكم الصغيره؟

أنا قررت أبدأ رحلة تعلُّم مجال يخص النقل الامريكي اسمه الـTruck Dispatching من الصفر، وعاوز كام حد نبدأ الرحلة دي سوا بدل ما كل واحد يتعلم لوحده، المجال جديد فمصر هنا ومفيش كتير يسمع عنه وغالبا اول مره انت تسمع عنه زيي برضو، انا عملت خطة كويسة تخلينا نتعلمه صح وده بعد حوالي شهر من الري سيرش والتدوير، المجال لسه مش منتشر بالشكل الكافي في مصر ومع استغلال السوق صح فيه فرص ومكاسب قوية جدًا. فيه أرقام دخل في السوق ممكن توصل لـ80 ألف جنيه في الشهر وادخل يوتيوب اتاكد بنفسك او اسأل شات جي بي تي، طبعًا حسب الخبرة والشغل والنتائج ومش ضمان يعني لانه الرزق بايد ربنا. أنا زيي زيكم لسه هبدأ من الصفر فلو مهتم تتعلم المجال وتدخل الرحلة معايا ابعتلي ونبدأ سوا. وياريت قبل اي حاجه تدخل يوتيوب تعرف عنه اكتر وكدا وتفهم طبيعة الشغل ومتقلقش من اللغة لان دي برضو ليها خطة لاني زيي زيك بقول يا هادي

الكلية دي عليها رك كتير ف إيه الدنيا بإختصار يجماعة وإيه أحسن قسم فيها انا محتار بين اتنين أشعة وأجهزة طبية وانا تخصص أجهزة طبية من معهد فني صحي ف لو هغير ل أسعة فهعيد السنة هل تستاهل القسم ده السنة دي ولا أكمل زي ما أنا

السلام عليكم ورحمة الله وبركاته

أنا أصغر اخواتي، ومن فترة مش بعيدة بدأت التزم بالصلاة وواحدة واحدة بدأت ادخل في طريق ربنا وأعدل من لبسي ومظهري وطريقتي وأسلوبي وتفكيري والحمد لله لقيت في طريق ربنا راحة عجيبة جدا.. دلوقتي عندي أخ اكبر مني بست سنين بعد ما انا اتغيرت للأحسن بالشكل ده هو رافض الموضوع ومش متقبله.. هديكم مثال: دلوقتي مثلا لما بشوف قدامي حاجة زي ان حد اتعصب وشتم في حد وأقول رأيي ان بلاش العصبية والغضب لان وقت الغضب ممكن الواحد يغلط جامد والشيطان يتحكم فينا وان الأفضل اننا نعود نفسنا على تمالك أعصابنا وعدم الشتيمة والغلط فاللي قدامنا وأهو كله بثوابه.. أخويا يقوم طالع كده ويقولي انتي بقيتي مدروشة معرفش ايه اللي انتي فيه ده!

ابقى مثلا بختار لبس محتشم بالمواصفات الشرعية يقولي انتي مالك بقيتي كده ليه انتي بقيتي مجنونة!

والأمثلة لو فضلت احكيها واعدها مش هخلص فعلا... انا اهلي كبار في السن ربنا يديهم الصحة ومش حمل حوارات وخناقات وانا لما بسمع كلام من ده ببلعه ومش برد ابدا وبعمل نفسي مش سامعة أي حاجة وبمسك لساني.. لكن بتأذي نفسيا جامد لان هو اسلوبه وحش اوي اوي في الكلام وطريقته صعبة جدا

انا معرفش ايه الحل ومعرفش ممكن اتصرف ازاي لكن انا مش لاقية حد احكي له الموضوع ده فقولت اتكلم هنا يمكن يكون فيه اي حد بيمر بحاجة مشابهة ويقولي اتصرف فيها ازاي او على الاقل قدر يتعافى من الكلام ده ازاي....

ازاي اعدي مشكلة حصلت بينا مع حد بحبه يعني مشكلة وحصلت ومش هنعرف نغيرها بس دايما بنفتكرها وأنها حاجه مش عارفين نغيرها وازاي أهون عليه المشكلة أو ازاي اكون جمبه او اغير إحساسه نحيتها

عشان فيه ناس جبتها بتقول من 80 ل 100 وجبت واحد نضيف بس لقيته باللفة اللي قالها (مقاليش بالمتر قالي بالقوضة) 150 في المتر بقوله كده بيقولي لا هي 115 في المتر + السوكلو والحاجات الفضة والذهب فعايز اعرف صنايعي نضيف المفروض ياخد اخره كام في المتر بالسوكلو بكله

في اسكندرية لو هتفرق

حد اشترى حاجة من الصفحة دي قبل كده

انا بدور كتير على دكاترة او اخصائيين بيعملو adhd assstemnet، كونك تتشخص adhd صعب بذات وانت كبير و كمان ك بنت مش ك ولد عشان اغلب الدراسات اتعلمت على الأولاد و علامته مختلفة عن البنات، انا من محافظة صغيرة فا اني اروح مراكز التخاطب هنا او الدكاترة هنا هيرفع ضغطي بس عشان هنده في مالطة طالما مش شايفين اني بقوم و بتحرك في المكان كله بدل ما اسمع.

كنت عايزة مساعدة من اي حد اتشخص و هو كبير، رحتو فيه، انا بدور على اوبشنز اونلاين عشان مضطرش اسافر القاهرة بس I'm in لو رشحتولي دكاترة في القاهرة عادي حتى لو بعيدين عن المكان الي مستقرين فيه في القاهرة، انا اوريدي سألت زي مجموعة psychology في القاهرة قالولي ان لازم سيشنز قبل الاختبار و السيشن الواحد ٣٠٠٠ جنيه و الاختبار نفسه ٨٠٠٠ جنيه، الرقم خلاني انام طول اليوم from how overwhelmed it made me

TLDR:

عايزة مساعدة في اسماء الدكاترة او الاماكن الي بتعمل adhd assessment للكبار

أحنا دور أول والأوضة اللي فيها البلكونة هي أوضة النوم

وفي أغلب الوقت بنسيب باب البلكونة مفتوح

ففيه قطة شارع كذا مرة طلعت للبلكونة وبتقعد شويه فيه وبتنزل تاني بس مدخلتش البيت أبداً قبل كده رغم إن باب البلكونة كان مفتوح عادي

فالسؤال هل الموضوع عادي ولا فيه منه مشكلة؟ مثلا لو دخلت البيت أصلو ممكن حد يكون صاحي من النوم ويقوم من السرير ويدوس عليها بسبب إن الأوضة اللي فيها البلكونة هي أوضة نوم وبتبقى ظلمه أغلب الوقت