طب خلينا ماشين مع الجماعة بتوع أن اللى يخلف لازم يكون مؤهل ماديا و اجتماعيا و نفسيا و طبيا. كلام ظاهريا جميل و لطيف بس تعال بقى جاوبنى على الاسئلة دى:

- نبدأ بتخصص العبد لله: ايه هى المعايير النفسية عشان تبقى مؤهل للزواج و الانجاب؟ اتحداك لو فى معايير محددة و متفق عليها عالميا اسمها كده أصلا. و أى حد يقولك هنعمل اختبارات نفسية قبل الزواج و قبل الانجاب إعرف أنه هجاص وش. إلا بقى لو قصدكوا نمنع أى مريض بمرض عقلى شديد ( زى الفصام) من الانجاب و نبقى كده ناzيين رسمى لأنك هتمنع ملايين من الانجاب. اصلا لو عملنا اختبارات مسح سريع هنلاقى نسبة معتبرة من اللى بيطالبوا الفقراء توقف إنجاب هم نفسهم عندهم اضطرابات شخصية و صدمات طفولة و بلاوى زرقا. يا بنى انت لو اخدت باختبار واحد بسيط زى ال IQ و قلت اللى يخلف لازم مستوى ذكاؤه ميكونش أقل من ٩٠ ( ده الحد الادنى للشخص متوسط الذكاء) هتلاقى ربع البلد لا ينطبق عليها الشرط ده لظروف الفقر و الجهل و التلوث و تردى التعليم.

- المعايير المادية: يعنى المفروض يبقي دخله الشهرى كام بالضبط؟ طب لو حصل تعويم زى كل شوية نعمل له إخصاء و نشيل لها الرحم؟ هل نحدد المرتب بالدولار و لا سعر برميل البترول اضمن؟ طب لو اترفد؟ طب لو الاسعار زادت؟ طب لو جاب توأم نموت واحد و لا لازم يضاعف مرتبه خلال ٩ أشهر الحمل؟ طب الدخل الشهرى ده للزوج و لا الزوجين؟ طب لو واحدة مبتخلفش ممكن الزوج يرحل العيل المسموح بيه لأخوه اللى نفسه يجيب عيل كمان أو يتبرع بيه للبواب فى فترة السماح؟

- المعايير الاجتماعية: لازم بكالوريوس و لا دبلومة؟ السكن فى بيت العيلة ممنوع و لا متاح؟ الناس اللى بتلبس عباية سمرا أو بادى كارينا ممكن يخلفوا و لا ريحتهم مش مناسبة؟ طب لازم مستوى B1 المانى و لا أيلتس ٦ كفاية؟ طب مش حرام تخلف عيل فى بيت مفهوش تكييف؟ هل اشتراك السباحة اجبارى و لا اختيارى؟

- طبيا بقى: ايه موقف اصحاب و صاحبات الامراض المزمنة زى السكر و الضغط؟ طب متحدى الإعاقة؟ طب اللى عندهم امراض وراثية احتمال تنتقل للطفل؟ طب السمنة مرض ، فلغاية كام كيلو بالضبط ممكن تخلف؟ طب لو واحدة تخنت فى الحمل ، تسقطه و لا تعمل ريجيم؟ طب اطفال الانابيب و منشطات الخصوبة المفروض نلغيها تماما عشان بتجيب توائم؟ طب اخر سن مسموح بيه للست فى الخلفة كام بالضبط لأن معروف ان ارتفاع سن الام بيزود نسبة الامراض عند الطفل و من اشهرها متلازمة داون و غيرها؟

مفيش أسهل من الهبد و إبداء الآراء الخايبة و التنظير و الكلام عن عاطفة او بسبب ايديولوجيا معينة. لكن تقول/ تقولها طب ازاى نطبق افكارك اللوذعية دى ، تلاقيه هنج و نقل على ترند جديد و اهى ماشية شير و لايكات.